د لرليد او ماموریت ټاکنه

چکیده

لرليد (Vision) او ماموريت (Mission) هغه دوه ستراتيژيک مفاهېم دي، چې د بېلابېلو دولتي او خصوصي ادارو، سازمانونو او پروژو لپاره د يو اصلي مسير او لوري د ټاکلو، موثرې او اغېزمنې رهبرۍ او ستراتيژيک اهدافو او اوږدمهال پايلو د ترلاسه کولو په پار تثبيت، انتخاب او ليکل کيږي. په ټوليز ډول د لرليد او ماموريت ټاکنه او بيان يوازې يوه نظري چاره نه ده، بلکې يوخورا اړين ستراتيژيک بهیر دی، چې بايد  يو سازمان، ادارې او پروژې د داخلي او بهرنيو واقيعتونو، ارزښتونو، غوښتنو او امکاناتو په رڼا کې په ليکلي بڼه ترتيب شي او اړوند اداره يې بايد د محتوا تعبير ته به کتو قدم په قدم د پلي کېدو څارنه او امکانات برابر کړي. له دې امله په څرګندو ټکو ويلای شو، چې لرليد او ماموریت د يوې ادارې او سازمان لپاره د يووالي، هڅونې، تشویق او پايښت لرونکې ودې لپاره مهم او حياتي اساس جوړوي او له مخې يې هره اداره خپلو مطلوبو موخو ته رسيږي.